Fii Kaɓɓe Sorayɗe e Haylilugol
67. Nanu non miɗo halde ko selli e fii
fiɓeteeɗe e jumla ngo'ol kongol.
68. Ko ɓadaaki fenaande e sikkitagol
waɗu ɗum njooɓaari to weddoyagol.
69. Wata faa'ida faatore fii ko wa min
naniraaa ɗun, ƴoogu ko woyndu malal.
70. Sabu nofru malaandu siŋorde mu'un
ko e hoore malaande e lizmondiral.
71. Ko si ɓandu malaama si hoore malee.
Jooman yeɗiroy men jango malal.
72. Sabu Maccuɗo Maa mo resanɗaa ɗun
tefugol, jaɓanaa Mo nyalaande kulol.
73. Sow julde e makko sowaa kisiyee
e Sahaaba e Aali e yimɓe malal.
74. Miɗo seedoo Lamɗo ko gooto waroowo
si wurnita, malkisa, rokka malal.
75. Siiwaaɗo ko maccuɗo Makko Nulaaɗo
E windere timminiraaɗo nulal.
76. Nulanooɗo e maayube jibnuɓe ɗun
gila Aadama fuɗɗiranoo loopal.
77. Feƴƴiino ko yondina gaanin ɗum
kono haala no tentira fillitagol.
78. Ndaaree kalimaaji ɗi fillorten
sabu goonga yo tentu to noddingol.
79. Joŋanoodu to Salli Bilaali ko wooturu
haa tuma wuttanaɗen galagal.
80. Kala julde ko Faatiha jangantee,
zikruuji e jogli alaa selugol.
81. *Kala jogdu no wondi e zikru mu'un
gila nyande nde farlaa haa reugol.
82. *Baydoolo mo alɗuɗo rokki danyay
ko to Allah Muhammadu moɓti ɓural.
83. (Yo O juulu e Makko O hisna mo hande
e jango ko sortortaa limugol.
84. *Yo O juulu e Makko O hisna mo fannaa
no hiira no weeta e jokkondiral.)
85. Goodal, Geno, luttal, luutondiral
e tageefo, e wellet yondinagol.
86. Maa nande e yiide e halde e wonde
nanoowo, yioowo e jom halgol.
87. Ɗe'e sappo e go'o ardiiɗe, taƴor
wajibii ma e haɠɠee Jom senagol.
88. Riiwan Mo kharal maa yarzimagol
kuugal maa sembe ɗe Jom botugol.
89. Ko tatiije ɗe halɗen ɗee wietee
dagotooɗe e hagghee Jom tagugol.
90. Baasal, puɗal, reugol, yerondirde
e huunde tagaande hatonjingol.
91. Pahu, mbumdan, mumde maa wonugol
paho, bunɗo e on mo alaa daalol.
92. Maa yiɓde kharal maa yalzimagol
kuugal maa sembe ɗe battinugol
93. Ɗe'e sappo e nay lidduuje wonii
riiwaaɗe e hagghee Jom luttal.
94. Ɗe'e jeetati kaɓɓe e dow
noogay
andee ko sorayɗe e yondinagol.
95. Hattande e muyde e gandiɗugol
ngurdam luttoojan maa wonugol
96. Ko O Waawuɗo e Jom gandal
Ko O Wurɗo ko nii Jom wootiɗugol.
97. Ɗe'e jeenay waɗɗike fellitu ɗum
ko Siforɗo ɗe pooma kabii to azal.
98. Riiwaaɗo tabii'a e fuɗɗuɗo en
ɗe'e mey lintaama to Jom dagagol.
99. Wiu: ronkude, wawnee, majjude, maayude
Lamɗo Seniiɗo, ko nii wonugol
100. Ko O ronkuɗo, annyo, O majjuɗo
maa
ko O mayɗo ko nii Jom lintinagol.
101. Maa nyiɓde tabii'a e yenɗude
men
ɗe'e sappo e go'o jaɓataa tabital.
102. Noogay e ɗiɗiije ɗe haalu mi
ɗe'e
ko sorayɗe e jumla hatonjingol.
103. Naatii ɗo'o kaɓɓe cappanɗe
jowi
ley yondinagol e hatonjingol.
104. Fiɓanee ngola kongol luttuɗe
ɗen
ko ɗe sappo e jeego'o naati e ngol.
105. Nunɗal, hoolaare e yottingol
wajibii ma e hagghee yimɓe nulal.
106. Riiwan ɓe ko laatii liddu mu'um
wa fenaande e janfa e suuɗude nulal.
107. Danyan ɓe sifaaji ɗi nagghisataa
kala wiiɗo dagaaki ko jon fenugol.
108. Gomɗinde Malaaika en e Nulaaɓe
e defte samaau nyalaande
kulol.
109. Ɗe'e nay wajibii ma e jumla me'en
no mahalɗori liddu e fellitugol.
110. Timmii ko no naata e simtirgol
jangen ɗe fiɓen ɗe adaade lajal.
111. Ɗe'e sittu wa sittuunaaje, najii
bungayɗo no majjiɗe nyande kulol.
112. Mo no andi ɗe, anduɓe fow fottii
ko o muumini, luttii kuuɗe dewal.
113. *Laatii lukha Aarabe maa ko Pular
e ko lutti e bolle, yonay taƴoral.
114. Si no weeɓi o anda haɠiiɠa ɗu'um
si on andana fow ma'anaa e dalil.
115. Nde'e yimre no ɓittani lingurde
ɗum
yo o ndar to jawaahira fow ko ƴial.
116. Kono kaɓɓe no sella e gaayi
mu'un
e ko jojji e lurral yimɓe Nulal.
117. Ko wanaa wahdaaniya anduɗo ɗun
yonataa ko wanaa si o andu dalil.
118. Jon arsi wi'ii: "Allaahu ahad."
ɗun wontani wahdaaniya dalil.
119. Si o huuwu dewal himo jortoranaa
sabu ɗun e Nulaaɗo danyoyde malal.
120. (Joomiiko yo hisnu mo haa abadaa
e Sahaaba e Aali e yimɓe Nulal.)
121. Jannee ɓeynguuli ko rokkiraɗon
fii Allah e ɓurɗo e yurmondiral.
122. Kala accuɗo jannude ɓeyngu
mu'un
ɗe'e kaɓɓe, o nimsay nyande
kulol.
123. Kala neɗɗo mo andaa ɗun o wonii
keefeero, wonaa woo luutondiral.
124. Si o almi bonay, si o seedi bonay,
si o hirsu ko jiibe, bonay resugol.
125. Wata anduɗo ɗun e mo andaa ɗun
resindir, ko fasaadu wanaa dewgal.
126. *Ɗe'e kaɓɓe dagintaa jawdi
tanaa
sabu kirse ko danyata woo ko halal.
127. Kala toonyuɗo nangi ko wuuri
tanaa
si waray wata hirsir fii dagagol.
128. *Ko wa girƴa si hirsa si jiibu ko terko
o nangiri nguyka e daggitugol.
129. Sakkangol mayɗo ko mu'una wiaa
hertortaa teewu e wellitugol.
130. Sabu jawdi ko joomun anniyotoo
sakkoo ndi, gasirtaa faandanagol.
131. Ɗun hertortaa jon kellefuyee
sabu ɗun ko lijaara e dow kuugal.
132. To'e ɗen wano ɓurdiri ɓurdira
non,
*alanaa suddiiɗo e muuna geɓal.
133. Wano fottirɗen alanaa mo geɓal
*e khaniina jihaadi e wellitugol.
134.Sabu deftere Allah waɗaa mo e ɗii
ɗiɗi sakko o nanga e majji geɓal.
info@webfuuta.site