webFuuta
Pular Ajamiyya

El Hadj Tierno Abdurahmani Bah
Ƴeewirde Fuuta

Faade e Kamaraati Mamadu Bela Dumbuya

1. Gimi adduɗaa fii taskagol ɗin andu won-
nde alaa e majji ko goɗɗo wattira saatugol.

2. Ko si huunde ɓoyli si ɓoosoyee maa fewnitee
Gimi ɗin no hattini nantondirde e feewugol

3. Si no woodi hay si ko matta wattu mi andu dey
ko ka maafe ɓeydu mi gabbe lanɗan welnugol.

4. Si tawiino sugu maa yimɓe sappo no woodunoo
nder leydi Gine yimugol Pular hettay ɓural.

5. Bela Dumbuyaa fash'inte jannuɗo hoore mun
haa damboyaa e rowiiɓe faamu e andugol.

6. Bela Dumbuyaa hi winda waajoo wallifoo
Gimi dambondirɗi e sawra men on fewnugol.

7. Bela Dumbuyaa gimi makko ɗin ko ɗi nandi woo
ko wa dembe njuuri e dambondirde e lewñugol.

8. Si tawii a sikkiti fontu deftere makko nden
Gimi sawrayanko nde janguɗaa nde ko ghirragol.

9. Gimi maa ko nandi ko gimɗi Cerno mo Mombeyaa
ilugol e feppondiral etoodi e norɗugol.

10. Mo no andi soro maa Cerno Abdul haawotaa-
ko geɓal ko heɓuɗaa jangugol maa fewjugol.

11. Yimugol ko dokkal ɓayru Jooman okkorii
ma ka fallu makko mi rerɗinii ma e soobagol.

Labe nyande 14 Ibriilu 1976