webFuuta
Pular Ajamiyya

El Hadj Tierno Abdurahmani Bah

Ƴeewirde Fuuta

Afrika

1. Kamaraati en heɗitee fota
Faamon yimoowo ko wowlata
Moni bee si anda ko huuwata
Moni bee si anda ko nangata
Fii gollanoygol Afrika
Golle ɓantayɗe en ɓanta ndii leydi men.

2. Moyyhintinen Afrik men
Wano moyyhinirɗen shartu men
Darapoo me'en maa Imnu men
Armee me'en laawol me'en
Weltoɗen hendagol Endepandansi men.

3. Gollooɓe ɓen fow gollida
Dyannooɓe ɓen fow jannida
Dhee ɗenɗe men fow yiitida
Wona haala woota si nangida
Fii gollanoygol Afrika.
Dolninen Arme men sakkoɗen keeri men.

4. Yo sukaaɓe Afrik faamondir
Yo sukaaɓe Afrik yurmondir
Yo sukaaɓe Afrik jannindir
Yo sukaaɓe Afrik wallindir
Waɗa golle goote e Afrika
Tamboɗen mawninen Endepandansi men.

5. Kala jangi faami yo ɓannite
Gandal me'en heyɗintinee
Nyeeñal me'en yaltintinee
Ellaaji fow martintinee
Fow fota gollana Afrika
Tamboɗen mawninen Endepandansi men.

6. Ndar kart Afrik weltoɗaa
Ngol ɗuuɗugol men immoɗaa
Gollaa no yiitidiren waɗaa
Kala bawɗe maaɗa ɗe okkaɗaa
Ara fotta hoɗuɓe e Afrika
Weltoɗen ndaarugol kart Afrik men.

7. Afrik di Sid e Angola
Gine Portokeesi e Gambiyaa
Gine Español e Mozambikaa
Wallen si ɗin fow rinɗoya
Dhin ɓeyda doole e Afrika
Hettagol ɗin wonay doole Afrik men.

8. Moyyhintinen Afrik men
Wano moyyhinirɗen shartu men
Armeeji men Imnuuji men
Wona huunde wootere Afrika
Dhoftoɗen shartu men sakkoɗen keeri men.

9. Hey moyyhinen “marshee komen”
Dhun fewna ɓanta njulaaku men
Dhaɓɓen e nder ɗee leyɗe men
Yaltintinen lekkeele men
Nyawndiren ñawɓe e Afrika
Nyawɓe fow selliray barki lekkeele men.

10. Afrik yo waɗu izzinji mun
Afrik yo irty ngaluuji mun
Afrik y hoolor golle mun
Monibee yo dadito hawaaɗi mun
Gollen no tiiɗira Afrika
Tiiɗugol leydi Afrika nafay yimɓe men.

11. Afrik no yurmina mayɓe mun
Dartiiɓe porte e parte mun
Almaami Saamori e doole mun
Alhadji Umaru e gande mun
Alfaajo Yaaya Afrika
Nee ho ɓen sottunoo leyɗe Afrik ɗen.

12. Afrik yo hoolor lonto ɓen
Tugaale Afrik jaggeɗen
Wano Seeku Tuuree lanɗo men
Wallen ɓe wallen Afrika
Hittinen tambagol “Initee” Afrik men.

13. Gollen “plan” men “septennal”
Soppen jasen nangen demal
Aawen tuten wuuren halal
Hollen ɓe jangaa ɓen ɗatal
Iwa miskinaaku e Afrika
Piiji fow ɗuuɗa e nder Gine men.

14. Gine ɗoo ko “P.D.G.” woni
Dyowlol me'en ngol jalbini
Komiteeji fow ngol hentini
Oo ERDEAA Gine hitiinii
Fii yiitindingol Afrika
Alla Giɗo wallu men reenu Afrik men.

Gimol windanaagol sukaaɓe Timbi-Madiina.
Pita e 1965.